«Вернемся ў прававое рэчышча». Пагаворым пра ператрус

У сучаснай Беларусі актуальнымі і штодзённымі сталі такія рэчы, як затрыманне, суды, віды пакаранняў. Сёння паразмаўляем пра працэдуру ператрусу.

Калі да вас прыйшлі з ператрусам, гэта не значыць, што вас падазраюць у злачынстве. Прыйсці могуць да любога чалавека, калі ёсць падставы меркаваць, што ў доме ёсць сродкі злачынства ці рэчы, якія маюць дачыненне да злачынства. Значыць, калі сусед тэлефануе і кажа, што ў вас ёсць сцяг, гэта, канешне, не сродак злачынства. Тым не менш, у цяперашніх беларускіх рэаліях міліцыя імчыць ліквідаваць гэты небяспечны прадмет.

Такім чынам, да вас прыйшлі.

• Спачатку супрацоўнікі павінны паказаць пастанову аб правядзенні ператрусу. У правым верхнім вуглу мусіць быць надпіс «Санкцыянірую», подпіс пракурора і гербавая пячатка. Але ў справе, якая патрабуе неадкладнага правядзення ператрусу, санкцыю пракурора атрымліваюць ужо пасля. Яму павінны паведаміць цягам 24 гадзін ад моманту правядзення ператрусу.
• Пры ператрусе абавязкова павінны прысутнічаць панятыя ў складзе не менш за двух чалавек. І гэта мусяць быць не зацікаўленыя ў выніку справы людзі. Міліцыя, як правіла, прыходзіць са сваімі панятымі. Бывае і так, што адзін з двух панятых указвае месцы, дзе яшчэ забыліся паглядзець. Да пачатку ператрусу можна заявіць хадайніцтва і папрасіць замяніць такіх незразумелых людзей на тых, каго вы ведаеце, напрыклад, вашых суседзяў. Не факт, канешне, што заменяць. Але такое права ў вас ёсць.
• Пры ператрусе можна настойваць на ўдзеле ў ім вашага адваката альбо патрабаваць бясплатнага, калі на момант правядзення ператрусу вы затрыманыя.
• Прасачыце, каб з пачаткам правядзення ператрусу пачалі складаць пратакол.
• У пратакол ператрусу вы або панятыя маеце права ўносіць заўвагі. Да падспісання пратакола ўважліва прачытайце яго, адзначце ўсё, з чым нязгодныя або лічыце незаконным. У пратаколе не пакідайце вольных месцаў, стаўце прочыркі.
• Канфіскаваныя пры ператрусе рэчы і дакументы паказваюцца прысутным, запакоўваюцца і апячатваюцца на месцы правядзення ператрусу і заносяцца ў пратакол канфіскацыі.
• Падчас ператрусу вы можаце не адказваць на пытанні. А таксама неабавязаныя даваць паролі ад камп’ютараў або тэлефонаў - спасылайцеся на 27 артыкул Канстытуцыі.
• Калі лічыце, што ў выніку ператрусу парушаныя вашы правы, то можаце падаць скаргу ў пракуратуру. Доказы, здабытыя пры ператрусе з парушэннем заканадаўства, не маюць юрыдычнай сілы.

Зараз колькасць ператрусаў павялічваецца, узровень рэпрэсій расце. Але немагчыма змяніць свядомасць людзей і страхам прымусіць сябе любіць. Могуць правесці 1000 ператрусаў, канфіскаваць 1000 сцягоў, але ўлада не зацісне волю людзей да свабоды ад таталітарнага рэжыму.

Жыве Беларусь! 

Падтрымаць ТУТ.