Віртуальны адвакат для беларусаў унутры краіны

Ад сёння працуе Advakatby_bot – аўтаматызаваны сервіс у Telegram па кансультаванні ахвяраў рэпрэсій. 

Яго распрацоўкай займаліся адвакаты, пазбаўленыя ліцэнзій за абарону палітвязняў. Кансультацыйную падтрымку аказалі праваабарончы цэнтр «Вясна», фонды BYSOL і «Краіна для Жыцця», грамадская кампанія By_Help, ініцыятыва Dissidentby. 

Дадзены чат-бот дае парады ў залежнасці ад варыянтаў, якія абярэ карыстальнік. Advakatby_bot кансультуе па наступных сітуацыях:

• «Затрымалі вашага блізкага»;
• «Вас выклікаюць у органы»;
• «Вы плануеце перасекчы мяжу»;
• «Праблемы ў калоніі ў вашага блізкага»;
• «Атрымаць дапамогу або экстранна эвакуявацца з Беларусі».

Advakatby_bot папярэджвае пра неабходнасць выдаліць чат-бот пасля выкарыстання, пра што неаднаразова нагадваецца падчас яго выкарыстання і даецца спасылка на адпаведную відэаінструкцыю (распрацаваную Кіберпартызанамі).

Неўзабаве Advakatby_bot запрацуе ў вэб-версіі, якая будзе дзейнічаць толькі пры выкарыстанні VPN (або за мяжой), што будзе больш бяспечным для карыстальнікаў у Беларусі.