Дзень Глабальнага пікету салідарнасці з Беларуссю

Святлана Ціханоўская заклікае ўсіх беларусаў падтрымаць адзін аднаго ў дзень Глабальнага пікету салідарнасці з Беларуссю.

«29 траўня 2020 года я ў прамым эфіры ўбачыла, як на пікеце затрымліваюць майго мужа Сяргея Ціханоўскага. Прайшоў год, і напярэдадні 29 траўня я хачу звярнуцца да кожнага, хто глядзіць гэтае відэа, як да самой сябе. Лічыце гэта ўнутраным маналогам, які вядзе кожны з нас», - Святлана Ціханоўская звярнулася да беларусаў напярэдадні 29 траўня.

У гэты дзень яна заклікала ўсю міжнародную супольнасць падтрымаць беларусаў і правесці Глабальны пікет салідарнасці з Беларуссю. Але – галоўнае – каб самі беларусы падтрымалі адно аднаго.

Кожны можа:

• Падтрымаць родны горад ці вёску, расказаць пра яго ў сваіх сацсетках і «Пражэктары рэгіёнаў».
• Аплаціць перадачы палітвязням у фондзе «Краіна для жыцця» ці падтрымаць сем'і вязняў сумлення ў фондзе BySol.
• Сабраць паплечнікаў і арганізаваць вулічную акцыю.
• Напісаць ліст тым, каму зараз немагчыма датэлефанавацца.
• Падтрымаць Сяргея Ціханоўскага ў акцыі "Дзе вашыя тапкі, беларусы?"  - Для гэтага дастаткова пакінуць тапкі ў любым месцы горада, дзе іх заўважаць.
• Насіць белае адзенне ў падтрымку акцыі #КолерCупрацьЦемры.
• Друкаваць плакаты, маляваць графіці - як кажуць, "рабі, што можаш, з тым, што маеш, там, дзе ты ёсць".