Заява Святланы Ціханоўскай пра недапушчальнасць уварвання войскаў Беларусі ва Украіну

Беларусь сёння краіна-агрэсар, якая бярэ ўдзел у вайне з Украінай. З тэрыторыі нашай дзяржавы ідуць войскі захопнікаў і ляцяць ракеты на мірныя гарады, Беларусь дае інфраструктуру для рамонту тэхнікі і лячэння параненых.

Фактычна, засталася апошняя чырвоная рыса - удзел беларускіх войскаў непасрэдна ў ваенных дзеяннях. У апошнія дні паступае інфармацыя аб тым, што лукашэнка рыхтуецца перасекчы і яе. Народнаабраны лідэр Беларусі Святлана Ціханоўская звярнулася да беларускіх вайскоўцаў і заклікала не здзяйсняць злачынны крок.


Святлана Ціханоўская: «Нам паступае інфармацыя пра магчымае ўварванне войскаў Беларусі ва Украіну, і таму я звяртаюся да беларускіх вайскоўцаў.

Я заяўляю:

1. Аляксандр Лукашэнка ўжо здзейсніў дзяржаўную здраду, даўшы тэрыторыю Беларусі для расійскай агрэсіі супраць Украіны. Гэтая агрэсія супярэчыць нацыянальным інтарэсам Беларусі і з'яўляецца злачынствам, а таксама наўпрост супярэчыць Канстытуцыі Рэспублікі Беларусь. Ён і ўсе службовыя асобы, якія садзейнічаюць агрэсіі, немінуча паўстануць перад судом і панясуць пакаранне за дзяржаўную здраду, а ў выпадку ўварвання ва Украіну – і за ваенныя злачынствы.

2. Уварванне беларускай арміі ва Украіну – гэта крок з незваротнымі наступствамі. Ён стане ганебнай плямай на адносінах з украінскім народам і яшчэ больш ізалюе беларусаў ад знешняга свету – аж да жалезнай заслоны, за якой Беларусь не будуць разглядаць як самастойную дзяржаву, а жыццё ў краіне прыйдзе да галечы.

3. Усе, хто аддасць загад пра ўварванне войскаў Беларусі ва Украіну, незалежна ад пасады і воінскага звання, паўстануць перад трыбуналам.

4. Усе, хто выканае гэты заведама злачынны загад, будуць адказваць перад законам.

5. Ваеннаслужачыя і любыя службовыя асобы, якія адмовіліся выконваць злачынныя загады, вызваляюцца ад адказнасці за невыкананне такіх загадаў. Права не выконваць заведама злачынныя загады гарантаванае Законам. Зафіксаваць сваю нязгоду з загадам можна прамым дзеяннем – склаўшы зброю.

6. Ваеннаслужачыя, службовыя асобы і грамадзяне Беларусі, якія любымі даступнымі спосабамі прадухілілі выкананне злачынных загадаў, вызваляюцца ад адказнасці.

7. Ваеннаслужачыя, якія пакінулі поле бою або якія здаліся ў палон ва Украіне, вызваляюцца ад адказнасці.

Загад увесці войскі ва Украіну – гэта не толькі загад адправіць на верную смерць вайскоўцаў нашай краіны, але і загад усім нам, беларусам, адмовіцца ад незалежнасці і сваёй будучыні».

Падтрымаць Фонд
Як вы хочаце дапамагчы:
50 75 100 250 500
Аплата праз PayPal на рахунак фонду
Фонд "Краіна для Жыцця"
Дапамагае палітвязням і іх сем'ям